Այսօր մեծ բանաստեղծ Եղիշե Չարենցի հիշատակի օրն է: Դժբախտ զուգադիպությամբ նախօրեին իր մահկանացուն է կնքել Չարենցի թոռնուհին՝ Հասմիկը: Նա վախճանվել է Հոլանդիայի հիվանդանոցում: Հայտնի է, որ այդ պահին նրա կողքին եղել է մայրը՝ Անահիտ Չարենցը, ինչպես նաև զարմուհին՝ Նանեն:
Այս ցավալի տեղեկությունը հայտնել է Հասմիկի քույրը՝ Գոհար Չարենցը: Գոհար Չարենցը գրել է հետևյալը. «Մեծ վշտով հայտնում եմ որ երեկ Հոլանդիայի հիվանդանոցում խաղաղությամբ իր մահկանացուն կնքեց քույրս Հասմիկ Չարենցը մոր՝ Անահիտ Չարենցի և դստերս՝ Նանեի ներկայությամբ. Լույս իջնի հոգուն»:
Այս ցավալի առիթով իր ափսոսանք է հայտնել գրականագետ Սիրանուշ Մարգարյանը: Նա գրել է հետևյալը. «Տիկին Գոհար ջան…. Ցավալի՛, ցավալի՛ լուր: Ափսո՜ս, Հազա՛ր ափսոս։ Նոյեմբերվերջյան տխուր, սարսափելի օրերը՝ Չարենցների մահով ողբերգական…
Ամուր գրկում եմ, ցավակցում բոլորիդ: Թող լույսերի ու խաղաղության մեջ հանգչի…»,- իր ցավակցական խոսքն ավարտել է գրականագետը:
