Ալեքսանդր Լապշինը հերթական հրապարակումն է արել, որտեղ հայտնում է, որ Սպիտակի և Գյումրու երկրաշարժի օրվա տարելիցի առիթով ինքը փոքրիկ էքսպերիմենտ է արել՝ ստուգելու համար ադրբեջանցիների վերաբերմունքը հայերի նկատմամբ: Նա առաջարկել է իր ադրբեջանցի հետևորդներին՝ ցավակցել հայերին այդ ցավալի օրվա առիթով:
Նա ասում է, որ բնականաբար ինքը Ադրբեջանում ապրող սովորական ադրբեջանցուց այդպիսի ցավակցական խոսք չէր ակնկալում, սակայն արտասահմանաբնակ ադրբեջանցիները նույնպես չեն արձագանքել:
Բլոգերը նշում է, որ գրառումը կարդացած հազար ադրբեջանցիներից մեկնաբանություն է թողել ընթամենը վաթսունը, իսկ մնացածը վախեցել, խուսափել են արձագանքել: Արձագանքող վաթսունի մեջ էլ միայն երկու ադրբեջանցի է ցավակցական խոսք գրել:
Արձագանքող ադրբեջանցիներից մեկն իսրայելաբնակ է եղել, մյուսը՝ Մոսկվայի բնակիչ: Մյուսները մեկնաբանություններում փառաբանել են Ալիևին, գրել, որ Ղարաբաղն իրենցն է և այլն, իսկ ոմանք էլ հարց են ուղղել, թե ինչու են Իսրայելում պաղեստինցիներ սպանվում:
Բլոգերը հրապարակումն ավարտում է տարակուսանքով, թե դա ինչ կապ ունի Սպիտակի երկրաշարժի հետ:
